Ábrese a veda! Este luns 11 de novembro comezou a campaña da centola en Galicia. Xa o domingo os barcos saíron dos portos para botar os miños, que se levantaron o propio luns, levando a terra os primeiros exemplares do crustáceo rei da tempada.

A previsión desta campaña que acaba de comezar é boa e agárdase que se poidan alcanzar os límites diarios de captura. A cota máxima de centola fíxase en 35 kg por barco e día, cantidade á que se lle engaden os mesmos quilogramos para cada un dos tripulantes inscritos e a bordo, o que supón que nunha embarcación cunha tripulación de tres persoas é uns 105 quilos como máximo.

A campaña da centola é unha das campañas máis importantes para os mariñeiros das Rías Baixas e coa que máis se factura durante todo o ano, polo que estes meses de novembro e decembro, co Nadal xa ás portas, vense coa esperanza de levantar o exercicio do sector pesqueiro, xa que moitas embarcacións que saen a capturar este crustáceo levaban máis dun mes paradas sen saír a faenar.

Arte de enmalle: miños para capturar a centola

A centola (Maia squinado) é un dos crustáceos máis apreciados de Galicia e un clásico das festas de Nadal. O período de captura comeza a mediados de novembro (este ano o día 11) e remata a finais de xuño.

Para a pesca desta especie utilízanse artes de enmalle, xeralmente miños e, nalgúns lugares, raeiras. En Galicia hai 877 naves autorizadas para o emprego de miños.

Que é o enmalle? Son aquelas artes constituídas por pezas de rede ensambladas formando aparellos rectangulares que pescan mediante trampas ou enredos das capturas ao intentar cruzalas. Colócanse en posición vertical, grazas a unha correa superior de flotadores e ao lastre que levan na súa parte inferior. Segundo a forma de pescar podemos distinguir entre redes de deriva ou redes abertas/fixas, como é o caso dos miños, compostos por tres paneis.

Contámosche máis sobre as artes de pesca con redes de enmalle e como funcionan nesta sección web .